Raah aur Raahi

Ye kavita hai sukh ki aur dukh ki. Yah kavita hai Jeet ki aur haar ki.Ye kavita ek aise shakhs ko paribhashit karti hai jisne kai baaziyan jeeti hain lekin haar ko bhi saharsh sweekara hai. Yah shakhs pichle kuch waqt me kuch baaziyan haara hai kintu yah hara hua insaan nahi hai. Is shakhs ki har saans aas paas me umang, ullaas, aur prerna sinchti hai. Is kavita ke madhyam se gam me bhi muskarane ke bhav ko alokit kiya gaya hai aur har sthiti me lakshya ko saakar karne , sakaratmak soch barkarar rakhne ka aalekh hai. Aage pade..................

Ek nigah lakshya par

Dilon me housle prabal

Ye kadam manzilon se sawal karte hain!!

Har gam me gire, har gam me uthe

Zaar zaar hum, lute pite

Man me chahat bemisal rakhte hain!!

Choti aankhon me sapne bade

Rode raah me ade khade

Ye faasle bhi iraadon ko salaam karte hain!!

Sthiti hai visham zara

Zara jatil hai mazra

Kadam kadam pe sathi humi se sawal karte hain!!

Teri ek ek jeet me meri duaen hai mili hui

Chumo jab jaam jeet ke, paoge meri haar ki mahak ghuli hui

Jeet mile, khushi mile sabhi ko, har dua me fariyad karte hain!!

Wo samajh baithe ki main haar gaya

Andheron se ghabra bhag gaya

dost mere, andheri raaton me dil me roshan mashaal rakhte hain!!

Mana chand haar chakhi hai maine

Chand jeeton ka jaam bhi chuma hai maine

Haar ho ki Jeet ho, khel me jazba kamal rakhte hain!!

Ye kadam na ruke the na ruke hain

Ye iraade na jhuke the na jhuke hain

Ye kadam dar kadam har kadam manzil se sawal karte hain!!